खारूताईचा वाटा
खारूताईचा वाटा
खिडकीसमोर आहे एक उंच झाड...
नावगाव माहीत नाही वाढलंय मात्र ताडमाड
वसंत ऋतूत पाने होतात हिरवीगार...
पहाटेपासूनच असतो पाखरांचा स्वैरसंचार !
कोकिळेची कुहुकुहू,पोपटांची मस्ती...
साळुंकीच्या उड्या, लव्हबर्ड्सची प्रेमाची कुस्ती !
हळूच एक मोठी फांदी खिडकीतून आली...
खारुताई ने घरात यायची आयतीच संधी साधली !
करवंद, जांभळं ,भुईमुगाच्या शेंगा...
खारुताईने मेवा पळवून दाखवला ठेंगा !
कॅमेरात बद्ध करताना गोल डोळे लुकलुकले...
भित्र्या भागूबाईचे कान क्षणात उभे राहिले !
झुपकेदार शेपटी हलवत पळाली सरसर झाडावर...
चपळता तिची पाहून हेवा वाटला क्षणभर !
भुईमुगाची शेंग कुडूम कुडूम खाल्लीस...
कांगारुची छोटी प्रतिकृती तू मजला भासलीस !
फळे,कोवळे कोंब खाताना जमिनीत बिया पुरल्यास ...
नकळत पर्यावरणाचा होणारा ह्रास थांबवलास !
वृक्ष संवर्धनाचे काम झाले सहज अजाणता...
कृती तुझी सांगते कर्म करा,फळाची अपेक्षा न करता !
एवढासा जीव तुझा पण धावलीस रामसेतू बांधायला...
श्रीरामांचा आशीर्वाद मिळाला कायमचा मिरवायला !
धन्य ती खारुताई!