घर पाहावे बांधून

संसाराची सुरुवात होते जेव्हा

स्वप्न घराचे अंकुरते मनात

एक एक काडी जमवतो

माणूस राबून उन्हातान्हात

स्वप्नांचे इमले असतात उंच

गाठोडं असते नेहमी तुटपुंजं

पाया मारतो घेऊन मग कर्ज

स्वेच्छेने शिरी येते हौसेचं ओझं

विटेवर चढते वीट थर मनावर

स्वप्न बांधताना तो नसतो भानावर

माती, सिमेंट, चुना सगळं चालतं

वाढणारं घर त्याच्याशी होतं बोलत

आपलंच घर जरी काही मागत नाही

हातातल्या पुंजीवर कधीच भागत नाही

हातातल्या गोष्टी जातात हाताबाहेर

घर बांधण्याआधी घरचाच मिळे आहेर

जमेल तशी एकेक वीट जोडतो सांधून

कधी चिमटा पोटाला कधी खातो रांधून

सोपं नसतं घेणं स्वत:च्या हातावर गोंदून

म्हणून म्हणतात... एकदा घर पाहावं बांधून!