भेट तुझी माझी

निघालास घाईमधे , दूरदेशी तू जाणार

सांग ना सख्या मजला , पुन्हा कधी भेटणार ? //ध्रु//

विद्याभ्यासासाठी आता , जाणे रे तुजला प्राप्त 

उच्चविद्याविभूषित , आस मनोमनी सुप्त

प्रगतीचा आलेख तू , सतत उंचावणार   //१//

विश्वासाचा मजबूत , आधार मला दिलास

प्रीतफुलात सुगंध , मनोभावे भरलास

समजावले मनास , तरी ना समजणार  //२//

प्रीतभारल्या दिनांचे , सदा असावे स्मरण

रेशमाच्या आठवांचे , कधी नको विस्मरण

एकरुपता आपली , कधी न भंगणार  //३//

दिन , महिने , वर्ष , सहज उलटतील

वाटेकडे सख्या तुझ्या , आर्त डोळे लागतील

विरहाचा काळ सांग , सख्या कधी सरणार?  //४//