आपली मराठी

प्रश्न भाषेचा निर्माण होतो तेव्हा तेव्हा 

केवळ नावालाच वापरली जाते मराठी

इंग्रजी आणि हिंदी म्हणजे पुढारलेले

तर आपली हीनदर्जेची वाटते मराठी..

मग...

खरंच रक्तारक्तात भिणते का मराठी ?

तुम्हीच सांगा....

दोन मराठी माणसे एकत्र येऊन सुद्धा

संवादात अज्ञातस्थळी हरवते मराठी..

आपल्याच लोकांमध्ये बोलता बोलता 

कुठेतरी मध्येच अचानक संपते मराठी

तेव्हा....

खरंच श्वासाश्वासात गर्जते का मराठी ?

तुम्हीच सांगा...

शाळेत देखील इंग्रजीचे प्रस्थ वाढत असून

नुसती विषयापुरती मर्यादित असते मराठी

दऱ्याखोऱ्यात नद्यांमध्ये गावाच्या वेशीवर 

तटस्थ राहूनी वाट आपली पाहते मराठी

तेव्हा....

खरंच गावागावात वाढते का मराठी ?

तुम्हीच सांगा...