मनुजा तू

तुझ्या आपल्या माणसांविना, जगशील कसा मनुजा तू

खोट्या, परक्या लोकांसोबत, हसशील कसा मनुजा तू

जर कमावले नाहीस मित्र, नाही जपली मैत्री तू

खांद्यावरती त्या शत्रूच्या, रडशील कसा मनुजा तू

पणाला लाव कौशल्य तुझे, मनगटातले दाखव बळ

कष्ट न करता सहजासहजी, हरशील कसा मनुजा तू

नवरंगी या जीवनात तू, राहू नकोस कृष्णधवल

गजबजलेल्या जगी एकटा, रमशील कसा मनुजा तू

शिकला नाही जर विद्या तू, पोहायाची संसारी

संसाराच्या भवसागरात, तरशील कसा मनुजा तू