हरवलेलं बालपण ......
हरवलेलं बालपण ......
मोठा माणूस बनण्याची
फार झाली घाई
हरवलेलं बालपण मला
सापडेल का गं आई ?
अभ्यासाच्या गणितात
लागत नव्हता लळा
पिटीचा तास येताच
आवडू लागायची शाळा
चुकल्यावरती छडी द्यायला
पुन्हा येतील का त्या बाई
हरवलेलं बालपण मला
सापडेल का गं आई ?
चार आण्याच्या नाण्यानं
मन जायचं भरून
लिमलेटच्या गोळ्या आणि
बिस्कीट यायचं वरून
त्या चाराण्याची सर
आज नोटांनाही नाही
हरवलेलं बालपण मला
सापडेल का गं आई ?
चड्डीवरच्या मित्रांची
व्हायची पारावरती भेट
आपुलकीच्या गप्पांसाठी
कधी लागलंच नाही हो नेट
सुरपारंबीच्या डावासाठी
आता झाडंच उरलं नाही
हरवलेलं बालपण मला
सापडेल का गं आई ?
मनसोक्त जगण्याचे ते
वेगळेच होते दिवस
छोट्या गोड स्वप्नांसाठी
कधी केलाच नाही नवस
खूप सारं कमावलं
तरी राहतंय बरंच काही
हरवलेलं बालपण मला
सापडेल का गं आई ?