കവിത :- പൂരം. രചന :- ബിനു. ആർ.

കവിത :- പൂരം.

രചന :- ബിനു. ആർ.

കണ്ടുകണ്മയങ്ങുന്നുണ്ട് ചുറ്റിലും 

കാഴ്ചകൾക്കപ്പുറം നിറയുന്ന

വെള്ളിവിതാനങ്ങളിൽ 

കാണുന്നതെല്ലാം,ആരവങ്ങളിൽ

കാഴ്ചകളിലെ നേർക്കാഴ്ചകൾ!

കൊമ്പനും വമ്പത്തരം കാട്ടാൻ

കണ്ണുകൾ ഇടംവലം ചുഴറ്റിയെറിഞ്ഞ്

കെൽപോടുയർന്നുയർന്നു 

തലയും ഉയർത്തിപ്പിടിച്ചുകൊണ്ടു

നിൽക്കവേ, സ്വർണ്ണത്തിടമ്പിൽ

രാജപ്രൗഢിയോടെ നിറഞ്ഞാടുന്നു

ദേവീദേവ,തന്മയീഭാവങ്ങൾ!

കേളികൊട്ടിയാടുന്നൂ കോലങ്ങൾ

കുതിരയും കാളയും ഗോപുരങ്ങളും 

തേരുകളുമേറ്റിത്തളരുന്നു മാനവർ -

തൻ വിശ്വാസക്കോമരങ്ങൾ!

അന്ധവിശ്വാസമെന്നാർപ്പുവിളിപ്പവർ കൊട്ടിഘോഷിക്കുംജഢിലതകൾ!

നിറയുന്നു വിശ്വാസത്തിൻ മർമ്മരങ്ങൾ!

നിറയുന്നൂ,ഈശ്വരസമക്ഷത്തിന്നു-

മപ്പുറം,മുഴങ്ങിക്കേൾക്കുന്നുണ്ട് 

കതിനകളുടെ വിജ്രുംഭണങ്ങൾ

ഭയത്തിന്റെ നേരില്ലാകിരണങ്ങൾ

നെഞ്ചുരുക്കും വിഹ്വലതയുടെ

കാരുണ്യമില്ലാപടഹശബ്ദങ്ങൾ!

നുറുങ്ങിത്തകർന്നുപോകുന്നുണ്ട്

മനസ്സിൻഭ്രാന്തമാം നേരില്ലാവിറങ്ങലുകൾ

ഊരിത്തെറിച്ചുപോകും മാനസിക

വെല്ലുവിളികൾ, ഭയപ്പാടുകൾ 

ഇരുളിന്റെ കറുപ്പാർന്നനീലിമകൾ!

കൊട്ടിയുയരുന്നുണ്ട് പാണ്ടിമേളങ്ങൾ

പഞ്ചാരികൾ,ചേങ്ങിലകൾ ഇടയ്ക്കകൾ 

കൊമ്പുക്കുഴലുകളുടെ നാദങ്ങൾ 

മേളപ്പദങ്ങളുടെ കൊട്ടിക്കയറലുകൾ 

മേളംമുറുക്കും ആറാംകാല -

ആരോഹണാവരോഹണങ്ങൾ!

 പലർ മാനസികവിഭ്രാന്തികളെ തടവിൽനിന്നൂരിയെറിയുന്നുണ്ട് 

കാലത്തിൻ അലൗകികതകൾപോൽ 

അനന്തവിഹായസ്സിലൂടെ പല കാണാ 

മാനസികങ്ങൾ ലയിച്ചു ചേരുന്നുണ്ട്!

തോന്തരവുകളെല്ലാമിനിയിങ്ങു

മടങ്ങിവരാത്തവണ്ണം അനന്തത-

യിലേയ്ക്ക് മടങ്ങിപ്പോകുന്നുണ്ട് !

കാലമെല്ലാം നിർവൃതിയടയുന്നുണ്ട്!.

      ബിനു.ആർ.