അച്ഛൻ
അച്ഛൻ
എന്നുമെന്നും
അമ്പരപ്പുകളുടെ
മായാലോകം
കാട്ടിത്തന്നതും
സ്വകാര്യതകൾ മനസ്സിൽ മൂടിവയ്ക്കരുതെന്നു
പറഞ്ഞതും
വർണചിത്രങ്ങളുടെ
ലോകത്തും കണ്ണുനീരു-
ണ്ടെന്നു പറഞ്ഞതും
മുകളിൽ മരണം
വിളിച്ചോതും
ആഴക്കയങ്ങളിലെല്ലാം
സ്നേഹത്തിന്റെ പൂമ്പൊടികൾ
മഞ്ഞളരച്ചു തേച്ചിട്ടുണ്ടെന്നു പറഞ്ഞതും
കാണാമറയത്തൊളിച്ചിരിപ്പതെല്ലാം
നീലനിലാവിലൊരിക്കൽ
നീലപ്പട്ടുപോൽ
ആടിക്കളിക്കുമെന്നു
പറഞ്ഞതും
പൂവിനെക്കുറിച്ചെഴുതുമ്പോഴെല്ലാം
പുന്നാരത്തെക്കുറിച്ചും
പറയണമെന്നുപറഞ്ഞതും
ആകാശനീലിമയിൽ നിന്നു
ആടിത്തിമിർക്കുന്നവയെല്ലാം
അനന്തവിഹായസിലെ
അല്പത്തരമെന്നു പറഞ്ഞതും
കാണിച്ചും പറഞ്ഞും
തന്നതൊരാൾ മാത്രം... അച്ഛൻ.