ಜಾತ್ರೆಗೆ ಹೊಂಟಾಗ [ಅಂಶ ತ್ರಿಪದಿ]

ಎತ್ತೀನ ಚಕಡ್ಯಾಗ ಜಾತ್ರೀಗಿ ಹೊಂಟಾಗ

ಕತ್ತೀನ ಗಗರ ಗಲ್ಲೆಂದೂ/ ಗೆಣೆಕಾರ

ಮುತ್ತೀದ ಮೋಡ ಕೆಂದೂಳೊ

ಕಬ್ಬಳ್ಳೀ ಕೆರೆಹತ್ರ ಕಬ್ಬೀನ ವಲಮ್ಯಾಗ

ಹೊಬ್ಬಟ್ಟು ಎಳ್ಳ ಪುಡಿರೊಟ್ಟೀ |ನೀರೂರಿ

ಹಬ್ಬವು ಕಣೋ ಉಣ್ವಾಗ

ಹಳ್ಳಿಯ ಅಡಿಗೆಯೂ ಕಳ್ಳೀನ ಒಲವೂಡಿ

ಬೆಳ್ಳೀಯ ಮನವ ಬಿರಿಸ್ಯಾದ | ಗೆಣೆಕಾರ

ಜೊಳ್ಳಲ್ಲೊ ಜಟ್ಟಿ ಶಿಲೆಗುದ್ದೊ

ದಂಡೀನ ದುರುಗೇಯ ದಂಡೆತ್ತಿ ಜಾತ್ರೀಗೀ

ಬಂಡಿಯ ಸಾಲು ಬರುವಾಗ | ಮೂಡ್ಯಾವ

ದಂಡೆಯ ಮ್ಯಾಗ ಜಲಬಿಂಬ

ಪರವೂರ ಬಂಡ್ಯಾನ ಹರೆಯಾದ ಹುಡುಗಿಯೊ

ಕಿರುನೋಟ ಬೀರಿ ನಗತಾಳ್ಯೋ/ನಂಗೆಳೆಯಾ

ಜರಿಯದ ಸ್ವಬಗು ನಮಹಳ್ಳೀ

ಬಣ್ಣದ ಜೂಲೆಲ್ಲ ಕಣ್ಣನೇ ಕುಕ್ಕುತಾ

ಅಣ್ಣಯ್ಯ ರವಿಯೊ ಇಳಿಹೊತ್ತೂ /ನಂಗೆಳೆಯಾ

ಬಣ್ಣಿಸ ಲೆಂತೋ ಸೊಬಗ್ಹೋರಿ

ಗೂಡ್ಸೇರಿ ಹಕ್ಕೆಲ್ಲ ನಾಡೆಲ್ಲ ನಲಿವುಕ್ಕಿ

ಹಾಡ್ಯಾರ ಹಳ್ಳೀ ಸೋಬಾನ /ನಂಗೆಳೆಯಾ

ಗಾಡ್ಯಾನ ಸದ್ದು ನಭಹೊಕ್ಕೊ

ಓಡೈತೋ ಸುದ್ದಿಯ ಗಿಡುಗಂತ ಖಗಕಾಲ

ಮೂಡೈತೊ ಹಿಗ್ಗು ಮೊಗತುಂಬಾ |ಗೆಣೆಕಾರ

ನಾಡೈತೊ ಒಲವು ಎದೆಹುಟ್ಟೀ