ಜೋಗದೈಸಿರಿ
ಜೋಗದೈಸಿರಿ
ಪ್ರಕೃತಿ ಸೃಷ್ಟಿತ ವಿಸ್ಮಯವೀ
ಮಲೆಸೀಮೆಯ ಮೈಸಿರಿ
ಅಚ್ಚರೋಚ್ಚರಿ ಕಣ್ಮನಮೈಗೀ
ಜೋಗದ ಚೆಲುವಿನೈಸಿರಿ
ಧರೆದೇವಿಗೆ ಆಕಾಶಗಂಗೆ
ಹಾಲಿನಭಿಷೇಕ ಗೈದಂಗೆ
ಗೋಚರಿಪುದಾಬಿಂಬವೀ ಕಣ್ಗೆ
ಬೆರೆತಖಾತ್ರಿ ನಭಧರಿತ್ರಿ
ಭೂಲೋಕದೀ ಮನುಜಂಗೆ
ಅಮರ್ದುಣಿ ಅಮೃತವತಿ
ಅಮೃತಮಂ ಧರಿಸುರಿದಂಗೆ
ಕಂಗೊಳಿಪುದು ಶರಾವತಿ
ಸವಿದು ಜೋಗದೆ ಕ್ಷೀರಸಾರದೆ
ಮಿಂದ ಮರಬಳ್ಳಿಹೂಗಳೆ
ವಾತ್ಸಲ್ಯವೆ ಕಾಣದ ನನಗಿಂತಲು
ನೀವ್ಗಳದೆಷ್ಟೊ ಸುಖಿಗಳೆ
ಸಾಲ್ಗಟ್ಟಿ ತೇಲ್ವ ಬೆಳ್ಳಕ್ಕಿಗಳೆ
ಮೇಘವೇರಿ ಸಾಗಿಹೋಗಿ
ಪಾಲೊಳು ಮಿಂದಿದ್ದಕ್ಕೇನೆ?
ಬೆಳ್ಳಿಯ ಬಿಳಿರೆಕ್ಕೆ ನಿಮಗಿ
ಚಿಲಿಪಿಲಿ ಇಂಚರದ ಪಕ್ಷಿಗಳೆ
ಹಸಿರನೆಲದಿ ಸುಧೆಯ ಜಲದಿ
ಹಾಲ್ನೀರ ಗುಟುಕಿಸಿದ್ದಕ್ಕೇನೆ?
ಪಾಲ್ಗಂದನ ಚಿಣ್ಗಂಟ ನಿಮಗೆ
ಮಂಜಿಗೂ ಮಲ್ಲೆದಂಡಿಗೂ
ಎಲ್ಲಿಲ್ಲದ ನಂಟು ಅಲ್ಲಿರೆ
ಇಬ್ಬನಿಮೈಗೆ ಇನರಶ್ಮಿ ತಾಕದಿರಲೂ
ಮಲ್ಲಿಗೆ ಮುತ್ತಿಡದೆ ತೆರೆ
ಧುಮ್ಮಿಕ್ಕುವ ರಭಸದಿ ಚಿಮ್ಮಿದ
ಕಣಕಣಹನಿ ತುಂತುರಲ್ಲು
ಸ್ಪರ್ಶವಿಲ್ಲದೆ ಸೂರ್ಯರಶ್ಮಿಯ
ಅವಿತಿದ್ದವಾ ಕಾಮನಬಿಲ್ಲು