વસમો વિરહ

મિલનની વાટ જોવામાં,

જીવન મારું વીતી જાતું,

વિતે જનમો જનમ મારાં,

મિલન તોયે ન શીદ થાતું,

શાને તડપાવે શામળિયા,

રાખીને હૈયાને રોતું,

વિયોગે હૈયું તરફડતું,

દરદના દિલ મહીં માતું,

મનાવું કેમ હું તુજને,

એ તો કેમે ન સમજાતું,

વિરહની વેદના સહેતું,

તોયે ગુણલા તારાં ગાતું,

થતી આ જગમાં બદનામી,

થતી ચહુ લોકમાં વાતું,

તોયે તુજ નામનું ઘેલું,

જરી ઓછું નથી થાતું,

જીવનની બાજી હારીને,

 મરણનાં ઝોલાં એ ખાતું,

મિલનની એક પળ દઈ દે,

 નંદીને, તારું શું જાતું.