ઘર દીવડી
ઘર દીવડી
દીકરી છે, દીવડી રે,
આવી મારા ઘરને અજવાળતી.
ગુંજે એનો ઘરમાં કિલકાર,
આવી મારુ આંગણ શોભાવતી.
દીકરી છે મારો વ્હાલ તણો દરિયો,
વ્હાલનો એ દરિયો, કાળજડે કોરિયો.
કરે મારે અંતર ઘુઘવાટ....
આવી મારુ આંગણ શોભાવતી.
કાલા ઘેલા બોલથી, મનડું લોભાવતી,
લટકા ને મટકા કરી, સૌને લલચાવતી.
રણકાવી ઝાંઝર ઝણકાર,
આવી મારુ આંગણ શોભાવતી.
છો ને એ દીકરી, બની જતી માવડી.
સાતે પેઢીની, એ તારી દેતી નાવડી.
લેતી રે'તી સૌની દરકાર....
આવી મારુ આંગણ શોભાવતી.
આંગણિયું છોડે પણ નાતો ના તોડતી.
અંતરના તારથી સૌને એ જોડતી.
અણી વેળા દોડી આવે વ્હાર..
આવી મારુ આંગણ શોભાવતી.
નંદી બની દીકરી જગ ને ઘમરોળતી,
હદમાં રહી અનહદના દ્વાર એ તો ખોલતી.
સફળ કરે મળેલો અવતાર...
આવી મારુ આંગણ શોભાવતી.