પારકી થાપણ
પારકી થાપણ
અંતરથી ઉઠતો અવાજ,
દિકરી તું શાને થતી પારકી ?
વિરહની વેદના દઈ,
દિકરી તું શાને થતી પારકી ?
એક જ ક્યારીમાં, તમે બંને મહોરિયા,
એક જાય વેલડીમાં, બીજો લાવે વેલડી,
બન્નેમાં અંતર ઉભરાય,
દિકરી તું શાને થતી પારકી ?
લટકાં ને મટકા કરી, હૈયું છલકાવતી,
સુખમાં કે દુઃખમાં, મુખડું મલકાવતી,
તારાં નખરાં સહ્યાં નવ જાય,
દિકરી તું શાને થતી પારકી ?
અંતરનાં ઓઘથી, ઘરને અજવાળતી,
માતૃત્વ સદા તારાં, અંતરમાં પાળતી,
તારાં ત્યાગ તણાં મોલ નવ થાય,
દિકરી તું શાને થતી પારકી ?
શમણાં સૌ ત્યાગતી, પિયર પણ ત્યાગતી,
પારકાને પોતાના, કરે અનુરાગથી,
સાતે કુળને દીકરી તારી જાય,
દિકરી તું શાને થતી પારકી ?
માતા, પિતા, પતિ કેરી, તું તો છે લાડકી,
ઇશ્વરનો અંશ બની, નંદી એની લાડકી,
નારાયણી થઈને પૂજાય,,
દિકરી તું શાને થતી પારકી ?