કયાં છે દોસ્ત ?

એટલો તું અમીર કયાં છે દોસ્ત ?

ડંખતુ એ ખમીર કયાં છે દોસ્ત ?

વાત આગળ વધારવી તો છે,

એ તરફનો સમીર કયાં છે દોસ્ત ?

હાથ લંબાવી દાદ ના માંગે,

શેર છે, એ ફકીર કયાં છે દોસ્ત ?

ઝાંઝવાં ઓ સદા અમે પીધાં,

પ્યાસ મારી એ નીર કયાં છે દોસ્ત ?

આપણાં પર એ હોય છે નિર્ભર,

બાકી મનને લકીર કયાં છે દોસ્ત ?

તું જ કર તારા શબ્દની કિંમત,

હેમ છે, એ કથીર કયાં છે દોસ્ત ?

મ્હાત રાજા ને આપવા "જોગી"

પાયદળ છે, વજીર ક્યાં છે દોસ્ત ?