વિશ્વ ગુજરાતી ભાષા દિવસ

કક્કાથી લઈને બારાખડી સુધી 

રમતાંરમતાં શીખી હું તો ગુજરાતી 

મારા હૃદયના તાંતણે ધબકતી

મારી ભાષા ગુજરાતી 

ગમતી મને ગુજરાતી,

મહેસાણામાં હેડતી

ને કાઠિયાવાડમાં હાલતી

અને ચરોતરમાં તો ભૈ વિહરતી 

એવી મારી ભાષા ગુજરાતી 

ગમતી મને ગુજરાતી,

સુરતીએ ખાયધો લોચો

ને પટ્ટણીએ પીધી સાછ

વળી ચરોતરીએ પીધું ધરાઈને પોની 

એવી મારી ભાષાની બોલીઓ 

ગમતી મને ગુજરાતી,

બાર ગાઉ એ બદલાતી બોલી

બાર મહિના બોલાતી બોલી

Advertisement

પરોણાને આવકારતી

આવો રા કહીને વધાવતી

ગરબાનાં તાલે ઘૂમતી

ને સાહિત્યમાં છલકાતી

એવી મારી ભાષા ગુજરાતી

ગમતી મને ગુજરાતી,

અખૂટ શબ્દોથી શોભતી,

ને ફૂલોની જેમ સુગંધ પ્રસરાવતી

સામે રસ્તે ભટકાતી,

ને સિંહની જેમ ગરજતી 

છંદ અલંકારથી ઝગમગતી

ને ઈશારે વાત કરતી

એવી મારી ભાષા ગુજરાતી

ગમતી મને ગુજરાતી,

લાડુબાડુ ખાશો કે નહિ ?

પેનબેન આપશો કે નહિ ?

સાબુબાબુ મળશે કે નહિ ?

ગમ્મત ગુલાલ કરાવતી

એવી મારી ભાષા ગુજરાતી

ગમતી મને ગુજરાતી.