વિસામો

વાંકોચૂકો રસ્તો જિંદગીનો ને, હું ડગમગતી ચાલે ચાલતો

થોડોક હાંફતો ને વિસામો ખાતો,

નાના ટાબરિયાંને જોતો ને, મનથી દોડી જતો

થોડોક ધ્રૂજતો ને વિસામો ખાતો,

યુવાનોને જોઈને હરખાતો ને, તેની ચાલે ચાલવા મથતો

થોડોક થોભતો ને વિસામો ખાતો,

પ્રૌઢને જોઈને વિચારતો, છે હવે દિવસો સંસ્મરણોના

થોડુંક વિચારતો ને વિસામો ખાતો,

હવે આવ્યો બુઢાપો, તે તો મને બહુ ગમતો 

છૂપાયો છે જવાનીનો ખજાનો 

થોડુંક વાગોળતો ને રાજી થતો,

આમ તો હું ડગુમગુ ચાલતો પણ, મનપાંખે અહીં તહીં ઊડતો

પાછો ફરતો ને વિસામો ખાતો.