વીત્યા દિવસો
વીત્યા દિવસો
વીત્યા દિવસો રોજ મારા, ભ્રમણામાં
રાત વીતી છે સદા બસ, સપનામાં
વરસો જે ઈચ્છાને બુચકાર્યા કરી,
આજ હઠ લઈ બેઠી છે એ ધરણામાં,
એથી લાગ્યું છે સરળ જીવન-ગણિત,
અઘરા પ્રશ્નો છોડી દીધા અથવામાં,
થોડાં શમણાં છે ને અઢળક ભ્રમણાં છે,
બીજું ક્યાં કંઈ છે પ્રણયની ઘટનામાં,
‘રામ’ લખવાથી ફકત એ ના તરે,
શ્રધ્ધા પણ મુકવી પડે છે પથરામાં,
ક્યાં કશું ભીનું હતું કે એ બચે ?
સઘળું સળગી ઉઠ્યું નાના તણખામાં,
એ અચાનક આજ રસ્તામાં મળ્યા,
જાણે ઝરમર વરસી’તી ભર તડકામાં,
સાદ ક્યાંથી સાંભળે એ ‘આજ’નો,
જીવે જે ‘ગઈકાલ’નાં બસ પડઘામાં,
ખોટી લાગી સુખની વ્યાખ્યા બધી,
જયારે જોયું બાળ ‘મા’નાં પડખામાં !