ફેંસલો ના થઇ શક્યો

રાત આંખે આંજવાનો ફેંસલો ના થઇ શક્યો,

કે નજરને વાંચવાનો ફેંસલો ના થઇ શક્યો.

એ વિચારો મન ભરી આવ્યા છલોછલ ને હવે,

કાફલાને હાંકવાનો ફેંસલો ના થઇ શક્યો.

ચારણી જેવું મગજને સાવ પીંખી નાખશે,

આબરુને ઢાંકવાનો ફેંસલો ના થઇ શક્યો.

આભમાં આજે ન આવ્યો ચાંદ રીસાયો કશે,

તારલાઓ ટાંકવાનો ફેંસલો ના થઇ શક્યો.

આજ અંધારા મળ્યાં છે જિંદગીમાં 'ને જુઓ,

સૂર્યને પણ માંગવાનો ફેંસલો ના થઇ શક્યો.

આ તરફ તો આવવાની ના કહી દીધી પછી,

પાળ મધ્યે બાંધવાનો ફેંસલો ના થઇ શક્યો.

પ્રેમ કાજે ખોતરી લીધા જખમને મેં "ખુશી",

'ને હ્રદયને સાંધવાનો ફેંસલો ના થઇ શક્યો.