વિધવા ભાગ-36 પિયુ-પ્રિયા ગીત-પ

(રાગ-લેજો રસિયા રે રૂમાલ...ની પહેલી કડી પ્રમાણે)

જોજો, પિયુજી રે મારા કેવા રંગદાર છે !

બીજાને મળતા મળે, મારા સંગદાર છે, જોજો...

એની કામની ધગશ કેવી ખંતદાર છે !

ઘરનો ભાર ઉપાડી બન્‍યા ભારદાર છે, જોજો...

જુવો, ગોરાંદે મારી કેવી ચમકદાર છે !

એના પગે નુપૂર કેવા ઝમકદાર છે, જુવો...

મારા કામમાં થતી અડધી ભાગીદાર છે,

એતો પળેપળની મારી તો સાથીદાર છે, જુવો...

જોજો, પિયુજી રે મારા કેવો નાચ નાચે છે !

જાણે સંસારી નાટકના એ કલાકાર છે, જોજો...

એના હૈયે હરખનો મોટો ઉમળકો છે,

એતો સર્વે કામોના ખૂબ જ જાણકાર છે, જોજો...

જુવો, ગોરાંદે મારી ખોટાં વખાણ કરે છે !

એ કામ કરવામાં કયો મોટો ઉપકાર છે, જુવો...

સમાજમાં રહી સમાજનું કામ થાય છે,

જેઓ ફરજ બજાવે તે જ હકદાર છે, જુવો...

જોજો, પિયુજી મારા ખૂબ મળતાવડા છે !

એતો રસ્‍તો ભૂલેલાના સાચા રાહદાર છે, જોજો...

એના મનથી ઊંચનીચ બધું સરખું છે,

એતો બધાના નજીકનાઅંગતદાર છે, જોજો...

જુવો, ગોરાંદેના બોલ કેવા તો સૂરીલા છે !

એના સૌંદર્યનો કેવો સુંદર નિખાર છે, જુવો...

એની માનવતાની ખુશબૂ બધે પ્રસરે છે,

મુજ જીવનની એતો સાચી પતવાર છે, જુવો...