તું મને જોતો હશે

આભેથી ઝગમગતાં સિતારે તું મને જોતો હશે,

કોઈ નદીના સ્વચ્છ આરે તું મને જોતો હશે,

પાણીમાં છબછબિયાં કરી હું ઊછળીને નાચતો,

ત્યાં નાચતી કો' મેઘધારે તું મને જોતો હશે,

વનરાજી હેલારા લઈ મન મારું જ્યારે મોહતી,

ફૂલોની ખુશબૂના ઈશારે તું મને જોતો હશે,

તારા ગજબના આ જગતમાં જ્યારે હું આગળ વધું,

ત્યાં કોઈ તરણાના સહારે તું મને જોતો હશે,

'સાગર' લગાવી ડૂબકી કુદરતમાં હું ડૂબી ગયો,

ત્યાં તારા એ અદ્ભુત નજારે તું મને જોતો હશે.