તમે આવજો રે તમે લાવજો રે

તમે આવજો રે તમે લાવજો રે,

એક નાનકડું મનગમતું ફૂલ,

 

એનો રંગ હોજો રાતો,

જાણે સાજન મદમાતો,

પોંખવા હાલું વ્હાલે રે પુષ્પદૂત,

– કે તમે લાવજો લાવજો રેશમિયું ફૂલ,

 

વૈભવ હો વન જેવો,

નિત હો કલશોર નવો,

ના ખૂટે ખાટલિયે વાતોનાં પૂર,

-કે તમે લાવજો લાવજો સૌરભિયું ફૂલ,

ઝુલાવું બે હાથે એવું,

મ્હેંકે તમ ઉર જેવું,

ઢોળું અમૃતના મધૂરા રે કુંભ,

– કે તમે લાવજો લાવજો શર્મિલું ફૂલ,

 

હૈયે કેસુડાના રંગ,

રાધા કાનજીના સંગ,

ચાહતે ચીતરાવું સ્નેહના સગુણ,

-કે તમે લાવજો લાવજો મનગમતું ફૂલ,

 

ના કહું તને નાનકડું ફૂલ,

તું ખજાનો સ્નેહનો મહામૂલ,

તમે આવજો રે તમે લાવજો રે,

એક નાનકડું મનગમતું મનગમતું ફૂલ.