તારી યાદના ભીના રણ

અતીતની અટારીએથી,

મલકાતાં છલકાતાં આવે,

ખુલ્લી આંખે સપન દેખાડે,

સંતાકૂકડી રમવા આવે,

તારી યાદનાં ભીનાં રણ.

ખળખળ કરતી સરિતા જેવાં,

હાલકડોલક નૈયા જેવાં,

મઝધારે પહોંચી બોલાવે,

તારી યાદનાં ભીનાં રણ.

વગડે વગડે ડાળે ડાળે,

પંખી તેની પાંખ પ્રસારે,

હૈયાનાં ઝૂલે ઝૂલાવે,

તારી યાદનાં ભીનાં રણ.

કંઈક ગૂંજતું કંઈક ખૂંચતું,

આંખોમાં કસ્તર સરીખું,

દસ્તક દે દિલનાં દરવાજે,

તારી યાદનાં ભીનાં રણ.