કદાચ એ આવી પણ જાય
કદાચ એ આવી પણ જાય
હું રોજ વહેલી સવારે ઊઠીને ઉંબરા પૂજું,
તુલસી ક્યારે જળ ચડાવી પ્રગટાવું દીવો,
બસ ... જીવનની એક જ બાકી છે આશ,
કદાચ એ આવી પણ જાય......
તેને ગમતી પહેરું ગુલાબી રંગની સાડી,
ડઝનબંધ લાલલીલી ચૂડીઓની ખનક,
બસ.... સેંથીમાં પુરવાનું બાકી છે સિંદૂર,
કદાચ એ આવી પણ જાય.....
બનાવું હું તેમને મનભાવન પકવાન,
ફુલકા રોટલી અને બીરંજનો થાળ,
બસ....હવે પીરસવાની બાકી દાળ,
કદાચ એ આવી પણ જાય......
બપોરની ચાની છે તેમને ભારે તલપ,
આદુ અને એલચીનો મિશ્ર સ્વાદ,
બસ... છેલ્લો ઉભરો છે હવે બાકી,
કદાચ એ આવી પણ જાય......
થઈ સાંજ અને થયું સંધ્યા ટાણું,
બની ગયું છે હવે સાંજનુંયે ભાણું,
બસ...ગરમાગરમ ભાખરીની રાહ,
કદાચ એ આવી પણ જાય.......
થઈ ગઈ રાત અને ચાંદની પણ આવી,
ચાદરને નથી એકેય સીલવટ પડેલી,
બસ.....છે હવે બત્તી બુઝાવાની રાહ,
કદાચ એ આવી પણ જાય.....
દિવસ, રાત્રિ, વાર અને માસ બદલાય,
અષાઢ ગયો અને આવ્યો છે શ્રાવણ,
બસ....હર હર મહાદેવ બોલ્યાની રાહ,
કદાચ એ આવી પણ જાય.