સરદારનું ગીત - પ૮
સરદારનું ગીત - પ૮
હરિપુરા (ઈ,સ, ૧૯૩૮)
કોંગ્રેસ ભરવા માટે, સ્થળ શોધ થયેલ રે;
ને ગુજરાતની એમાં, થઈ હતી પહેલ રે,
સરદારે જગા શોધી, જે કુદરત ધામ રે;
તાલુકા બારડોલીનું, હરિપુરા મુકામ રે,
મોટું મેદાન ને પાસે, તાપી પસાર થાય રે;
જંગલ માંડવીનું ત્યાં, વાંસમાં વખણાય રે,
વળી ને સાદડી-પાલા, શાંતિથી મેળવાય રે;
જમીનો આપવા લોકો, હર્ષે તૈયાર થાય રે,
ગાંધીજી આ જગા જોઈ, ખુશીથી મલકાય રે;
ને સરદારને તેથી, પૂરો સંતોષ થાય રે,
મંડપ શણગારીને, રસ્તા ઠીક કરાય રે;
કરે સગવડો જેથી, મે’માનો ખુશ થાય રે,
રાખીને પાંચસો ગાય, દૂધ ને ઘી અપાય રે;
ચાવલ-તેલ-આટાની, સગવડો કરાય રે,
શુદ્ઘ થૈ જળ તાપીનું, પીવામાં વપરાય રે;
નળ-ગટરની પૂરી, ગોઠવણો કરાય રે,
એકાવન કળાભર્યા, દરવાજા બનેલ રે;
ને ચિત્રો દરવાજામાં, સુંદર ગોઠવેલ રે,
આમ કોંગ્રેસનું એક, નગર થૈ ગયેલ રે;
ને નંદલાલની સૂઝે, કમાલ ત્યાં કરેલ રે,
તાર પોસ્ટ દવાઓની, વ્યવસ્થાઓ થયેલ રે;
આગ બુઝાવવાનીયે, સગવડ કરેલ રે,
લોકોની આવ-જા માટે, બસ દોડી રહેલ રે;
નેતાઓ કાજ મંગાવી, મોટરો ગોઠવેલ રે,
રસોડામાં જમે ટંકે, વીસ-પચી’ હજાર રે;
ને પ્રદર્શન જોતાં સૌ, આનંદથી અપાર રે,
આવા પ્રસંગમાં થોડી, કરૂણતા ભળેલ રે;
રંગમાં ભંગ થોડોક, કુદરતે કરેલ રે,
**
બાકી આ નગરે લોકો, ખૂબ આનંદ માણતા;
ને સરદારને ખૂબ, દાદ દઈ વખાણતા.
(ક્રમશ:)