સ્મરણની નગરી

બચપણની યાદોનું ટોળું ધીમું ધીમું છલકે,

કીકીઓમાં ઉછળતું શૈશવ ધીમું ધીમું મલકે,

ભાગદોડમાં છૂટ્યા આજે એ આંગણ ને શેરી,

ક્ષણેક્ષણમાં આ જિંદગી આવી છલકે પલકે, 

વાતો સઘળી મૌન બનીને હળવે સરતી વહેતી,

કાળી રાતે ઝરમર વરસે ઝાઝી વાદળી ફલકે,

સૂની સૂની ડાળીએ એ કલબલ કલરવ ટહુકે,

સ્મરણની નગરીમાં કૈં રંગબેરંગી ફૂલડાં ઝલકે,

રંગત જામે દોસ્તોની એ સાંજ પડ્યાની સાથે,

જાણે કરમાયેલી ડાળો, લીલી થાતી હલકે.