શણગાર મોકલ

સજાવી તારા શબ્દોમાં મને કંઈક એવો શણગાર મોકલ

હું ઓળખી શકું જરા એક નજરે એવો અણસાર મોકલ

તને સમજવાની છે ઈચ્છા, ને ઓળખવાની આતુરતા 

બનાવટી હાસ્ય છોડી તું તારો અસલી કિરદાર મોકલ

ઝરમર ઝરમર વરસે ના બુઝાય આ તરસ દોસ્ત

બસ એકવાર વ્હાલનો વરસાદ અનરાધાર મોકલ 

આ નદીનું મીઠું જળ પીવા વાળા અનેક મળશે તને 

હું એક જ માંગુ, તું તારા દર્દ નો ખારો સાગર મોકલ

તારા વગર માગ્યે હું સુખ ને શાંતિ આપી ચૂકી તને

હું રડી લઈશ સંગાથે તું આંખોની અશ્રુધાર મોકલ

સહમતી તો છે મારી આ સમાજના રિવાજોની જુદાઈ પર

બસ આત્માના સાથી થવામાં તારા હૃદયનો સ્વીકાર મોકલ

સમજવાને કાજ તને, ખોવાઈ છે " શ્વેત " ક્યાંક દૂર

ભૂલી છું ખુદની ઓળખ ને, તું મારી જ તસવીર મોકલ