શબ્દોત્સવ

શબ્દ બ્રહ્મનું પ્રતિબિંબ છું

ને બ્રહ્માંડ નાયકનું નાનું શું અણુ છું

કલમથી વાવેતર  કરનારું બીજ છું

સંહિતાને પેટાળે ધરબાયેલ

સોનેરી શમણું છું

કલમ વડે કોતરણી કરનારું

શબ્દ તણાં શિલ્પીનું

ધારદાર ટાંકણું છું

એક એક સર્જનનો   

ઉત્સવ ઉજવતું ઊછળતું ને કૂદતું

ખળખળ વહેતું ઝરણું છું

શ્વાસે શ્વાસે સોહમ શોષનારું 

ઈશને અંતરિયે ઝુલાવનારું

હેત ભરેલું પારણું છું

વિચારોનાં વાવાઝોડાંને નાથનારું 

મન મંદિરનો પહેરો ભરનારુ

અભેદ બારણું છું

કલમની કટારથી     

અંધકાર ચીરનારું

નંદી હું અભિનવ

પ્રભાત અરુણું છું