રાધા રિસાણી

રાધા રિસાણી, ઓલ્યો કાન રે મનાવે !

જારે, જા કાનુડા કાળા કાળા કાનુડા !

બંસીને હૃદયે ચાંપી હોઠોથી વગાડે,

સૂર એના જોને ! મારું હૈયું ચીરી નાખે,

ગોવર્ધન પર્વતને આંગળીએ રે નચાવે,

સહુ વ્રજવાસીઓનાં દિલ હરખાવે,

હું રે અધીરી કાન જોવા દોડી દોડી,

આવું તારા દ્વારે કાન નિરખવાને ભોળી,

તોયે તું ન આવે મને શાને રે સતાવે ?

નહીં બોલું તારી સાથે, જાને ગોવાળીયાં,

રિસાણી રાધા, એને કાનુડો મનાવે,

કિયા રે કારણે ગોરી લીધા છે રુસણાં,

હું રે અટવાયો તો ગોપબાળોના વૃંદમાં,

ઓરે, સખી રે ના શોભે આ રુસણા ?

તારા વિના સખી મને ક્યાંયે ન ગોઠે ?

કહે તો પ્રિયે આજ ફરીથી વેણુ વગાડું !

કહે તો પ્રિયે, વૃંદાવનમાં રાસ રચાવું,

તારે કાજ રાધા ! આજ કરામત કરું, બ્રહ્માંડ નચાવું,

ના રુઠો રમણી, મારી રાધિકા રાણી,

નહીં હસો તો, કરી કરામત, સમસ્ત સૃષ્ટિ ડોલાવું.