પાનખરના પાન

પાનખરની ડાળના ખરતા પાન અમે,

વાસંતી ગીતે છાના ખીલીએ !

અમે ફૂલડાં સંગે વિહરીએ.... 

ફાગણ ફોરમતા સુગંધના દરિયે અમે,

રંગો લઈને એમાં તરીએ !

રંગતા, રંગાતા ઊડતા સવાલ

ઝાંકળ ઝીલીએ કે પછી મોતી.... 

જિંદગી આખી આ રંગમંચ રંગીન,

રંગોના દાવ અમે રમીએ !

પાનખરની ડાળનાં ખરતા પાન અમે

વાસંતી ગીતે છાના ખીલીએ.... 

ડાળીઓના ટહુકામાં એવા ડૂબ્યા, 

કે અમને પાંખો આવીને અમે ઊડ્યા !

ગુલમહોરે રંગીન યાદોમાં સર્યા 

પછી પીળા પર્ણોમાં આમ ખર્યા.... 

રંગાઈ રંગાઈ ને હવે કેટલું રંગાઈએ

ખરવાના દિવસો, અમે ખરીએ !

પાનખરની ડાળના ખરતા પાન અમે

વાસંતી ગીતે છાના ખીલીએ !

અમે ફૂલડાં સંગે વિહરીએ.....!