નથી મળતી

અલખની આંખમાં તો લાગણી ક્ષણભર નથી મળતી,

ખૂટે જો શ્વાસ તો આ જિંદગી પળભર નથી મળતી.

હતું એવું નિરાંતે ઊંઘશું ઓઢી કફન જાતે,

ખુશી પામી હતી જગમાં એ તો અંદર નથી મળતી.

ઘણાયે ચોપડા ફેંદયા, ને સરવાળા તપાસ્યા પણ,

અમારા આ નફાની ખતવણી સરભર નથી મળતી.

હૃદયના આ ઝખમને દાટવા શોધી જગા થોડી,

મળી અમને જગા જગમાં છતાં ભીતર નથી મળતી.

હશે જો હામ હૈયે ભીંત તોડીને ઉગો કાયમ,

પણ પીંપળ સમ બધાની જિંદગી સદ્ધર નથી મળતી.