નથી મળતાં
નથી મળતાં
હૃદયની લાગણીઓને સમજનારા નથી મળતાં
બધાને આ જગતમાં પ્રેમ કરનારા નથી મળતાં,
ફરે છે જાન લઈને તે હથેળીમાં સનમ કાજે
વતનની ધૂળ માટે જાન દેનારા નથી મળતાં,
વિના કારણ કરે વાતો જમાનાને બદલવાની
વખત આવે જમાનાને બદલનારા નથી મળતાં,
સુખી જીવન બીજાનું જોઈને મનમાં બળે છે સૌ
દુઃખી જીવન બીજાનું જોઈ રડનારા નથી મળતાં,
ઘરે છે સૌ પ્રસાદીમાં ઘણી મીઠાઈ ઈશ્વરને
ગરીબોને મુઠી ભર ધાન ધરનારા નથી મળતાં,
લખે જે જોડકા તેને મળે છે દાદ જાજેરી
'વિભવ' સારી ગઝલને દાદ દેનારા નથી મળતાં.