નાથ તું રાજી હવે

રણ સમું જીવન ભલે, જીવી જવું છે મોજથી !

ના, નિરાશા ઉર ધરું, કોળી જવું છે મોજથી !

શ્વાસ ચરખો ઈશ ચલાવે ! હોય કો' ચિંતા હવે ?

આશનું આંજણ કરી, મ્હોરી જવું છે મોજથી !

જીવતર સુખ દુ:ખ તણી ઘટમાળ, ઢળતી રાત દિન,

આગ હો કે બાગ ! બસ મ્હાલી જવું છે મોજથી !

લે પરીક્ષા જિંદગી, પાછા કદમ ના વાળવા,

શૌર્ય તો સૌંદર્ય છે ! ખીલી જવું છે મોજથી !

લાલિમા અકબંધ ભાળી મુખ, જગત પણ દંગ 'શ્રી', 

નાથ તું રાજી હવે ? પૂછી જવું છે મોજથી !