મને મંજૂર નથી

આખું જીવન તારી સાથે વિતાવ્યું પણ,

હજી પિયર જવા તારી મંજૂરીની જરૂર,

આ વાત મને મંજૂર નથી.

મારી કોઈ પણ ભૂલ પર તું ગુસ્સો કરે,

અને તારી ભૂલને મારે ઇગ્નોર કરવાની,

આ વાત મને મંજૂર નથી. 

આખું જીવન તમારી સેવા કરવાની પણ,

મારા મમ્મી પપ્પાની ખબર પણ ના પૂછે,

આ વાત મને મંજૂર નથી.

રસોઈમાં મીઠું પડ્યું હોય વધારે ક્યારેક, 

પણ એ નાની વાત પર મને મારવી,

આ વાત મને મંજૂર નથી.

ઘર ઉપરાંત નોકરી કરું તો પણ,

ક્યારેય મારો ઉત્સાહ ના વધારવો,

આ વાત મને મંજૂર નથી.

પરણી ને તારી સાથે આવી તો પણ,

કાયમ પારકી જ ગણવી મને,

આ વાત મને મંજૂર નથી. 

જિંદગી આખી સાસરામાં વિતાવી પણ,

મરતી વખતે સાડી પિયરની ચડે,

આ વાત મને મંજૂર નથી. 

સ્ત્રી અને પુરુષ સંસાર રથનાં બે પૈડાં પણ,

મારા સ્વતંત્ર અસ્તિત્વ માટે રોજ લડવું,

આ વાત મને મંજૂર નથી.