માવતરની માયા

મીઠાં ટહુકા ને મીઠા બોલ છે રે લોલ,

માવતરની માયા ઘણી હોય રે,

માવતરની હૂંફ પછી નહીં મળે રે લોલ.

હસતા મોંઢે વેઠી વેદના રે લોલ,

પીડાનો હતો નહીં પાર રે, માવતરની...

દુઃખી દેખીને રડતી આંખડી રે લોલ,

વેદનાનો નહીં કોઈ પાર રે, માવતરની....

બાધાઓ રાખી ઘણી આકરી રે લોલ,

દુઃખો વેઠ્યાં છે અપાર રે, માવતરની....

લાગણીથી ભર્યો સમંદર છે રે લોલ,

હૈયામાં હેત છે અપાર રે, માવતરની....

દેવું કરીને ઓરતા પૂરા કર્યા રે લોલ,

ઘડપણમાં બનજો આધાર રે, માવતરની.....

લાડી બેઠી ને ગાડી ઊપડી રે લોલ,

માવડીની લેજો સંભાળ રે, માવતરની.