કવિતા

આંબે મોહરી મંજરી ને મ્હેકાઈ કવિતા;

કલમ ચાલી કાગળ ઉપર ને લખાઈ કવિતા.

ઉભા આખા ખેતર વચાડે લહેરાઈ કવિતા;

સોળ વરસની છાની છાની શરમાઈ કવિતા.

ગોરંભે આકાશ, થાય વાદળાંનો ગડગડાટ;

મેઘ ધનુષ્યના સાતેય રંગોમાં મને દેખાઈ કવિતા.

હાલરડે, કસુંબલ ડાયરે કે પછી શૌર્ય ગીતોમાં;

જીવતી રહીને લોકજીભે ગવાઈ કવિતા.

ભર્યા સાગરેથી તરસ્યા ભલે રહો તમે;

કલકલ વહેતાં ઝરણાંમાં ઘૂંટડે ઘૂંટડે પીવાઈ કવિતા.