તને કંઈ થાય છે ?
તને કંઈ થાય છે ?
ઉકળતા ચરુને જોઈને,
હાંડલામાં વલોવાતી છાશ,
પાણીને ચક્રાકારે ફેરવતુું વમળ,
આ બધું જોઈને કંઈક થાય છે,
સરરર વહી જતા પૈડાં નીચેના
કાળા ડામર ને પૂછવાનું મન થઈ જાય છે
તને કંઈ થાય છે ?
પોટલાંમાં લંગાયેલા ઘાસને જોઉં છું,
રજકો એના પાન બીડી ચૂક્યો છે,
તેની નાની શી દાંડી પર જામેલું ટીપું,
શું ઘાસને કશું ન થાય ?
નિરાંતે ઘડીક પોરો ખાવા બેઠેલા બળદ પર
વારે વારે બેસતી પેલી માખીને
ઉડાડવા મથતા લાંબા કાન
હા, લાગે છે કાન ને કંઈક થતું હશે !
પીળા થયેલ પર્ણને સાચવી રાખ્યા હશે !
અળવીતરા પેલા પવને તે ખેરવી દીધાં,
શું એ પર્ણોને ડાળી છોડતાં કંઈ થાય ખરું ?