આજ રૂડો આવ્યો અવસર
આજ રૂડો આવ્યો અવસર
ટોડલાના તોરણીયા મીઠું મલકે કે આજ રૂડો આવ્યો અવસર;
ધમધમતા ઢોલ ગજવે આખું ફળિયું કે આજ રૂડો આવ્યો અવસર,
બેનડીનો ગજરો તો મહેંકે ચોપાસ કે આજ રૂડો આવ્યો અવસર;
નાનેરા ભાઈલાનું ગજવું હૂંફાળું કે આજ રૂડો આવ્યો અવસર,
માડીની ચાવીનો ઝૂમખો લળી લળી જાય કે આજ રૂડો આવ્યો અવસર;
બાપુનું ભાલ જાણે ઉઘડ્યું આકાશ કે આજ રૂડો આવ્યો અવસર,
ઠઠ્ઠા સાહેલીઓના કરે ગુલાબી ગાલ કે આજ રૂડો આવ્યો અવસર;
ફળિયાની આંખોમાં ઊડતો ગુલાલ કે આજ રૂડો આવ્યો અવસર,
તાતા થૈ ઝૂમી રહ્યું આંગણું કે આજ રૂડો આવ્યો અવસર;
કેસરિયો રંગ ઓઢી ઊતર્યો સાફો કે આજ રૂડો આવ્યો અવસર,
હથેળીમાં ચીતરેલો મોર હવે હૈયામાં ટહુક્યો કે આજ રૂડો આવ્યો અવસર;
ચાતકનું ચોમાસુ આજ આવ્યું ઘરઆંગણે કે આજ રૂડો આવ્યો અવસર.