જો વાત આવે તો
જો વાત આવે તો
નથી મારી પાસે સમય ઝાઝો મુલાકાત માટે,
પણ પ્રેમની વાત આવે તો આ ભવ ટૂંકો પડે.
નથી મારી પાસે શબ્દો ઝાઝા સંવાદ માટે,
પણ જિંદગીની વાત આવે તો શબ્દકોષ નાનો પડે.
નથી મારી પાસે ઊંઘ ઝાઝી આ રાત માટે,
પણ સ્વપ્નની વાત આવે તો કુંભકર્ણ કાચો પડે.
નથી મારી પાસે વાહવાહી ઝાઝી દાદ માટે,
પણ ગઝલની વાત આવે તો ઈર્શાદ ઓછો પડે.
નથી મારી પાસે ઊંડાણ ઝાઝુ આ સમાજ માટે,
પણ અંતરમનની વાત આવે તો સમુદ્ર છીછરો પડે.