ઝંખના

નામના થવાની ઝંખના પણ રે'વાની,

કામના થવાની પણ ઝંખના રે'વાની,

બે મણ લાકડા ને બે કિલો ઘી જવ તલ

અંતે રાખ થવાની પણ ઝંખના રે'વાની,

નાની અમથી ઢોચકીમાં રાખ ને હાડકા

તોય ગંગામાં જવાની ઝંખના રે'વાની,

તેરમાનો ખાટલો ને ખાટલામાં કૌતુક

વૈતરણી પાર કરવાની ઝંખના રે'વાની,

મુક્તિ મોક્ષ બધું ઠીક મારા ભાઈ

ગર્ભશ્રીમંત થવાની ઝંખના રે'વાની,

જીવતાની ક્યાં માંડી ધૂણતાં ને પૂછ

ભૂત બની નેય વળગવાની ઝંખના રે'વાની,

છોડી જર જમીન જોરૂ ચાલ્યો જંગલ

ઝંખના છોડવાની પણ ઝંખના રે'વાની.