હવે ઊડવું છે પંખીની જેમ

હવે ઊડવું છે પંખીની જેમ !

ખુલ્લું આકાશ અને કલરવતું ગીત, વળી વાદળું કોઈ ઓઢી લઉં તેમ,

હવે ઊડવું છે પંખીની જેમ !

વાડામાં બાંધેલા આયખાને સમજણની પાંખો બે ઓચિંતી ફૂટી,

લ્હાય જેવી ગરમીમાં દૂર પેલા મૃગજળની પાળો અચાનક તૂટી,

મૂંઝાઈ મૂંઝાઈને તો જીરવાનું ક્યાં લગી ? આજ હવે બાંધી લઉં નેમ,

હવે ઊડવું છે પંખીની જેમ !

વેંત જેવા આયખાના દિવસોય ટૂંકા ને ટૂંકી આ ધરતીની સીમ,

આપણે તો સપનાનો ખોબલો ભરીને હવે ઊડતા રહેવાનું અસીમ, 

મસમોટાં ડુંગરડા વીંધી-વીંધીને આ જીવતરને રાખ્યું હેમખેમ,

હવે ઊડવું છે પંખીની જેમ !

ખોલી દીધાં છે આ લોખંડી બારણાં, ને ભોંકાતી, રિબાતી જેલ,

આશાના અજવાળે જઈ હવે જીતવાનો ખુશીઓથી ઉભરાતો મહેલ,

આપણે તો પીંછાઓ વ્હાલમાં ઝબોળીને વાવેતર કરવાનો પ્રેમ,

હવે ઊડવું છે પંખીની જેમ !