તને લાગતું કેવું ?

પથ્થરોની પડખે પેલું મહેંક ભરેલું ફૂલ મજાનું, તને લાગતું કેવું ?

મુજને તો કોઈ ઝાકળ બિંદુ સૂરજના સપનાની સામે બાથ ભીડી લે તેવું,

તને લાગતું કેવું ?

ઊંચા ઊંચા પહાડો સામે કદી ન ઝૂકે વાદળ,

પથ્થર-પથ્થર ઘેરી લેતું તરણું આગળ-પાછળ,

જો ને પેલા ઝરણાં જેવું દરિયાની છાતીની ભીતર મારગ કાઢે તેવું,

તને લાગતું કેવું ?

પતંગિયાની પાંખો આગળ લૂ પણ જો ને હારે,

વનરાજાની ત્રાડો સામે હરણું માથાભારે,

નાજુક નમણા છોડ સરીખું વંટોળિયાની વચ્ચે ઊભા મરજીવાની જેવું,

તને લાગતું કેવું ?