હઠીલો મોગરો
હઠીલો મોગરો
એક હઠીલો મોગરો જોને,
મારગ વચ્ચે રુસણાં લેતો જિદે ચડી કંઈ બેઠો, એ મોગરો જોને,
ગામને આખું બાનમાં લેતો છેલ છોગાળો રહેતો, એ મોગરો જોને,
એને તો બસ ફોરણી થાવું ને ગેલમાં ગાવું ગીત,
નાર કોડીલી મલકે ત્યારે ગજરો થાવું નિત,
મહેંકો ભીના શ્વાસને ઘેરે, અદ્ધર-અદ્ધર રહેતો, એ મોગરો જોને,
મારગ વચ્ચે રુસણાં લેતો જિદે ચડી કંઈ બેઠો, એ મોગરો જોને,
એક હઠીલો મોગરો જોને..
ષોડશી કોઈ ગામની વ્હાલી ફરકી મોગરા પાસે,
ટેરવું જાણે અડ્ક્યું હેતે ઝાકળની ભીનાશે,
સસલાં સરીખી ષોડશી દેખી હાથ પસારી દેતો, એ મોગરો જોને,
મારગ વચ્ચે રુસણાં લેતો જિદે ચડી કંઈ બેઠો, એ મોગરો જોને,
એક હઠીલો મોગરો જોને..
છોકરીને તો હાથમાં ઊગ્યું શ્વેત સુંવાળું ફૂલ,
મોગરાને એમ પારકું થાવું કેમનું હોય કબૂલ ?
‘લાવ ને મારી મહેંકો પાછી’ મ્હો ફૂલાવી કહેતો, એ મોગરો જોને,
મારગ વચ્ચે રુસણાં લેતો જિદે ચડી કંઈ બેઠો, એ મોગરો જોને,
એક હઠીલો મોગરો જોને..
મહેંકો માંગે, શમણું ભાંગે, માને ના કોઈ વાત,
મોગરો રોકે ગામનું આખું મહેકીલું પરભાત,
ના હવે કોઈ ફૂલડાં-ફોરમ, ના હવે એ વહેતો, એ મોગરો જોને,
મારગ વચ્ચે રુસણાં લેતો જિદે ચડી કંઈ બેઠો, એ મોગરો જોને,
એક હઠીલો મોગરો જોને.