મોરપીંચ્છ ના મળ્યું

ગોકુળ ગામે ગલી-ગલીમાં ઘણું બધું રે જડ્યું,

પણ મોરપીંચ્છ ના મળ્યું.

જડ્યા રે મુજને કાનાજીએ પહેરેલા એ વાઘા,

જડ્યા રે ઘેલી ગોપીઓના ટોળે-ટોળા બાઘા,

ગોવાળોના ટોળા પાસે ગાયોનું ઘણ જડ્યું,

પણ મોરપીંચ્છ ના મળ્યું.

જડ્યું રે મુજને માખણ-મીસરી, જડી તૂટેલી હાંડી,

જડી રે મુજને યશોદાજીની દહીં વલોણી ડાંડી,

ખાંખાખોળા કરતા-કરતા અંગરખુંયે જડ્યું,

પણ મોરપીંચ્છ ના મળ્યું.

યમુનાજીને અંતે પૂછ્યું મોરપીંછનું ઠામ,

એણે લીધું સીધે-સીધું કાનુડાનું નામ,

કાના સાથે ગોકુળ છોડ્યું તે દી’થી ના જડ્યું,

મને મોરપિંચ્છ ના મળ્યું.