કાગળ લખું

નામ- સરનામા વિનાનો કોરો લે; કાગળ લખું;

થાય છે કે લે તને પણ થોડી તો અટકળ લખું.

આટલો લાંબો સમય આશ્વસ્થ સ્હેજે ક્યાં હતો;

વેઠવું સ્હેલું નથી; અણચિંતવ્યા અંજળ લખું ?

જળસભર આંખો છૂપાવી રાખી છે જો આજ દિન--

પર્વતો તોડી વહે તો એની પણ ખળખળ લખું.

એટલું સ્હેલું નહોતું ચૂપ રહેવું પણ સજન;

શ્વાસના અસ્તિત્વને પડકારવા આગળ લખું?

જેવું તેવું ક્યાં ચીતરવું રંગનો જ્યારે અભાવ?

એક ક્ષણનું આયખું હું ભવ્ય ને ઝળહળ લખું !