હરેક કળીએ કર્યો અદ્ભૂત શૃંગાર

આથમે શશી ને ઊગે દિવાકર,

કેવી સોહામણી લાગે આ સવાર !

સાત ઘોડાનો રથ લઈ આવે સૂર્ય દેવતા,

દૂર કરવા આ પૃથ્વીનો અંધકાર,

કિલ્લોલ કરે પંખી, છોડી અવની ઊડે આકાશ,

પંખીના આ આગમને જોને કેવું સુંદર સોહાય આ અંબર,

કેવી કરામત છે કુદરતની ! ફૂલો ઝાકળે ન્હાય,

જોને આ હવા ફૂલો મહેક્યાની લાવે અદ્ભૂત ખબર,

બાગમાં જોને આજે ફૂલોની જાણે બારાત આવી છે !

હરેક કળીએ કર્યો છે જાણે અદ્ભૂત શૃંગાર !

અવનીની હસીન સુંદરતાથી હિલ્લોળે ચડી આ અલબેલી સરિતા,

મળવા સાગરને જોને થઈ ગઈ એ અધીર,

ખડે પગે ઊભી છે ડાળની આ શાખાઓ,

ઝૂકી ઝૂકી આ સૂરજનો કરે આતિથ્ય સત્કાર,

આ સૂરજ ચાંદને આપે અશ્રુ ભીની વિદાય,

આ અંધાર કરે અજવાળાંનો ભવ્યાતિભવ્ય

આદર સત્કાર,

જોઈ પરોઢનું પ્રાકૃતિક સૌંદર્ય લાગે એવું,

જાણે ઈશ્વરે કર્યો છે કોઈ ચમત્કાર !