ગોતું છું

રહું છું ક્યાં જગતમાં, ગામ ગોતું છું,

હો પંચામૃત એવો જામ ગોતું છું,

મળે કાંટા, દુ:ખો હો કારમા સહેવા,

કરે સઘળું સહન એ ચામ ગોતું છું,

લડે સંસારમાં પગ પગ અડગતાથી,

સહી પીડા શકે એ હામ ગોતું છું,

ગુના કરતી રહું છું ડર વિના હર પલ,

પ્રભુ હું નિત નવા ઈલ્ઝામ ગોતું છું,

સગા વ્હાલાં બધાથી લાગણી ચાહું,

દરદ આપે નહીં એ ડામ ગોતું છું,

લખું છું ’દિવ્ય’ પૃષ્ઠો જિંદગીનાં હું,

સફર ખૂટશે, સુખદ અંજામ ગોતું છું.