દાદાની ફરિયાદ
દાદાની ફરિયાદ
કેમ છે બેટા કેમ હું જ પૂછું,
શું તને દાદાની યાદ નથી આવતી !
તને તો હું રોજ યાદ કરું છું
કેમ તને મારી યાદ નથી આવતી !
કોઈ વસ્તુ લેવાની તારી હઠ, તારા એ નાના પગલાંની ખનક
મને બહુ સાંભરે છે શું તને મારી સાથે વિતાવેલ પળોની યાદ નથી આવતી !
બજારમાં તારી મનપસંદ વસ્તુ જોતાં જ હું તને યાદ કરું છું
તો શું તને બીજાને એમનાં દાદા સાથે જોતાં મારી યાદ નથી આવતી !
ખાવાનું તો હું ખાવ છું,
પણ મીઠો ઓડકાર નથી આવતો
શું દાદા તમે જમ્યા એવું પૂછવાનું મન નથી થતું !
દવા તો હું લઉં છું, પણ જે માત્ર મને જીવતો રાખવા કાફી છે,
દાદા હવે તમને કેમનું છે, એમ પૂછ તો ખરા એ મને તંદુરસ્ત કાફી છે,
પણ શું તને મારા હાલચાલ લેવાનું મન નથી થતું !
તારા શહેરથી આપણાં ગામનું અંતર ઘણું છે
પણ દાદા હું તમને મળવા જલ્દી આવીશ એવી
આશા આપવાનું મન નથી થતું !
રિંગ તો મારા ફોનની વાગે છે, પણ કોઈ દિવસ તારા નામની રિંગ મારા ફોનમાં વગાડવાનું મન નથી થતું !
મને ખબર છે તું બહું વ્યસ્ત છે, પણ એની વચ્ચે દાદાનો અવાજ સાંભળવાનું મન નથી થતું !
ઝાઝી વાત ના કરીશ પણ તારી સફળતા તને મને જણાવવાનું મન નથી થાતું !
શું હું આમ જ ફરિયાદ કરે જ રાખું ? તને મારી ફરિયાદો પર પૂર્ણવિરામ મૂકવાનું મન નથી થાતું !