છે હવાની લહેર જીવન

આપશોને તો હરખશે આ બધી સુંદર ક્ષણો ! 

માંગશોને તો તરસશે આ બધી સુંદર ક્ષણો !

ઈશ કૃપાથી જિંદગી તો બાગ સમ સુંદર મળી,

માણશોને તો મલકશે આ બધી સુંદર ક્ષણો ! 

ઉર મહીં ખારાશ ને દ્વેષો ભરીને જો તમે,

રાખશોને તો ખટકશે આ બધી સુંદર ક્ષણો !

જિંદગી તો પ્રેમનું બંધન મજાનું છે હવે,

માનશોને તો રણકશે આ બધી સુંદર ક્ષણો !

છે હવાની લ્હેર જીવન જાણજો 'શ્રી' આટલું,

સાધશોને તો ચમકશે આ બધી સુંદર ક્ષણો !