બહુરૂપી ઝરૂખો
બહુરૂપી ઝરૂખો
ઠાલવે છે હરકોઈ હૈંયાની હેલ, ઊભા ઝરુખડે સંગ,
રંગાયો છે ઈ'જ ઝરૂખડો પળે-પળના રંગે સંગ,
સાંભરે છે મા'ડી યાદો શહીદ 'લાલ'ની, ઊભી ઝરૂખડે સંગ,
થયો કેસરિયો ઈ'જ ઝરૂખડો મમતા સંગ,
ઝંખે એ પ્રીત્યુઘેલી માશૂકા પ્રીતમતણાં નેણ, મરડી ઝરુખડે અંગ,
વીંધાયો ઈ'જ ઝરુખડો! કાતિલ નજરૂંનાં મિલન સંગ,
વળગી છે સખી-સહેલીયું વાત્યુંના વંટોળે, ઊભી ઝરુખડે સંગ,
મલકાયો ઈ'જ ઝરુખડો! મીઠી ટીખળે સહેલીયું સંગ,
ઘેલુડી માવલડી કેડીએ લઈ 'કાન'ને, ઊભી ઝરુખડે સંગ,
બોલ્યો ઈ'જ ઝરુખડો ! કાલી-ઘેલી બોલીમાં બાળ સંગ,
વાગોળી આખા દિ'ની ગાથા, 'તાત' ઊભા ઝરુખડે સંગ,
અટવાયો ઈ'જ ઝરુખડો ! લેખાજોખાનાં હિસાબ સંગ,
મૂંઝાઈ સાવ એકલી-અટૂલી એકલતા, ઊભી ઝરુખડે સંગ,
ડૂબ્યો આજ ઈ'જ ઝરુખડો ! શૂન્યતા સંગ,
ઠાલવે છે હરકોઈ હૈંયાની હેલ, ઊભા ઝરુખડે સંગ,
રંગાયો છે ઈ'જ ઝરૂખડો ! પળે-પળના રંગે સંગ.