આપણું વીતેલું બાળપણ

હાલને ભેરુ સાંભરે છે આજ આપણું બાળપણ, 

ગામના પાદરે વીતેલું એ આપણું અલ્લડ ભોળપણ, 

યાદ છે તને એ સ્ફૂર્તિભરી સવાર, 

જ્યાં વડની વડવાઈએ ઝૂલાતી આપણી કતાર ! 

રમતા'તા પેલી સંતાકૂકડીની માયાજાળ,

થતો થપ્પો જ્યારે મળતી છૂપાયેલાની ભાળ, 

કેવી શાંત ને થંભીલી હતી એ ઉનાળાની બપોર, 

રમવા કચૂકો ને અડકો-દડકો ઉભરાતો બાળસાગર ! 

અટવાટો આંધળોપાટોમાં દાવ આપનાર,

ને પોલીસ જેમ બતાવતો ઠાઠ આઉટ કરનાર ! 

રમતા'તા ગિલ્લી-દંડો ને આંબલી-પિપળી આંબાવાડીએ, 

મચાવતા ભારે શોરબકોર પકડવા લાકડી હથેળીએ, 

આજે પણ યાદ છે એ શેરીની ખદબદતી સંધ્યા, 

લગાવતા'તા ટાયરની રેસ આપણે હારે લંગોટિયા ! 

મૂકી ઠીકરી લંગડી રમી જીતતા'તા બંગલો મજાનો, 

તોડતા'તા થપ્પી ઠીકરીની તાકી એક નિશાનો, 

હાલને ભેરુ સાંભરે છે આજ આપણું બાળપણ, 

ગામના પાદરે વીતેલું એ આપણું ભોળપણ.